احمد وصلني لغاية تحت البيت وطلعت وانا مبسوطة لكن شعوري بالانبساط كان بيروح شوية شوية واحس بضيق جوايا لغاية ما تقريبا تأثير احمد علي اختفى
وكأني كنت مش مدركة حجم المصيبة اللي عملتها .. اول ما فوقت لقتني حبست نفسي في الحمام وبقيت بعيط وانا حاطة ايدي على بوقي علشان محدش يحس بيا .. عطيت كتير اوووي وانا مش عارفة المصيبة اللي انا عملتها دي عملتها ازاي .. ازاي اصلا سلمت نفسي ل احمد بالسهولة دي .. كان فين عقلي
فضلت في الحمام اعيط والطم لغاية ما سمعت صوت بابا من بره بيخبط وبينده عايز يدخل الحمام
غسلت وشي بسرعة وتمالكت نفسي وخرجت
روحت الأوضة بتاعتي
أحلام على السرير ملهية في التليفون بتاعتها
نمت على بطني وخبيت وشي بأيدي
أحلام: اتبسطي؟
رفعت وشي وبصيت على اختي
أحلام: بتعيطي ليه المفروض تكوني اتبسطي
انا: تقصدي ايه؟
ابتسمت وبصت للمراية بتاعة التسريحة
لقيت اسم احمد بيتكتب على ازاز التسريحة رجعت بصيت ليها وبصيت للمراية تاني ورجعت بصيت ليها
أحلام: ها مش كنتي معاه في شقته
وراحت ضاحكة
انا بصريخ: انتي مين؟ عايزة مني ايه
ماما دخلت جري على صوت صراخي
وحضنتني وهي بتبص ل اختي اللي متكلمتش وبتبص ليا ول ماما
ماما عرفت ان فيه حاجة وخافت هي كمان من أحلام
حضتني وانا بعدت عنها روحت نايمة على جنبي وخبيت وشي بأيدي وعمالة افتكر اللي عمله فيا احمد
ماما خرجت ل بابا
ماما: بقولك ايه انت دلوقت حالا تتصل بأدهم وتشوف الشيخ ده جه ولا مجاش.. انا مش هستنى لما حد من عيالي يجراله حاجة
سامي: حاضر هكلمة دلوقت
بابا مسك تليفونه واتصل بأدهم
سامي: ادهم مساء الخير
ادهم: مساء النور .. والله عمرك اطول من عمري كنت لسة هكلمك
سامي: طب كويس .. عملت ايه في موضوعنا
ادهم: ينفع بكره؟
سامي: اه ينفع .. بكرة امتى؟
ادهم: الساعة اربعة هنبقى عندك
سامي: تمام وانا في انتظاركم
ماما: ايه يا سامي جاي بكرة
سامي: اه جاي بكرة الساعة اربعة
الليلة دي كانت اطول ليلة على ماما اللي كانت خايفة ومرعوبة .. خايفة من فشل الشيخ وخايفة من توابع الفشل ده واللي ممكن يحصل لينا
الساعات بتمشي بالعافيه وماما مش عارفة تنام ولا يغمض ليها جفن لغاية الصبح لدرجة ان بابا كل ما ينام ويصحي يلاقي ماما لسة صاحيه جنبه
وعينيها مغمضتش غير الساعة سبعة الصبح
صحيت الصبح ولبست هدومي وخرجت علشان اروح المعهد لقيت بابا قاعد في الصاله من بدري وصاحي وقالي ارجعي اقلعي هدوم الخروج مفيش معهد النهاردة.
بصراحة مصدقت اصلا مكنش ليا مزاج اروح المعهد وحالتي النفسية زي الزفت ده غير اني منمتش طول الليل
فرجعت الاوضة قلعت هدومي ورجعت نمت
صحيت على الساعة 12 الضهر لقيت ماما بتروق الشقة ومصدقت لقتني صحيت وطلبت مني اروق الأوض بسرعة
حسيت ان الترويق ده وراه حاجة لكن ماما مقالتش السبب ولما سألتها قالتلي عصبية اعملي اللي بقولك عليه وانتي ساكتة
عصبيه ماما وتوترها كان باين عليها، فدخلت من سكات اعمل اللي طلبته.
اخويا سعيد نزل من الصبح الشغل بتاعه وماما كل شوية تتصل عليه علشان يجي ويسيب الشغل ضروري، وسعيد كل شوية يقولها لما يجي صاحب المحل مش هينفع امشي من غير ما استأذنه وماما زعقت معاه وقالت له تيجي حالا
أحلام خرجت وقفت في نص الصاله حاطة ايدها في وسطها ومبتسمة على اللي ماما بتعمله وقالت جمله خلت ماما قلقت وخافت اكتر
مفيش فايدة .. مش هيعمل حاجة
ضحكت بصوت رجالي خلت ماما اتفزعت وقلبها كان هيقف
خرجت من الأوضة لقيت ماما قاعدة عالكنبه بتعيط وحاطة ايدها على وشها
قعدت جنبها مفكرة بابا زعلها وفضلت اسألها ماما مالك .. ردي علي
ماما سابتني ودخلت اوضتها
الساعة جت تلاتة اخويا سعيد جه وبابا قاعد في الصالة و ماما عماله تروح وتيجي في الشقة
كل ده وانا مش فاهمة في ايه
الوقت بيمشي ببطئ رهيب على ماما
وكلنا قاعدين في الصاله انا وبابا واخويا سعيد وأحلام قاعدة عالكرسي
حاطة رجليها الأتنين على مسند الكرسي وبتسمع اغاني في الهاند فري
لغاية ما تليفون بابا رن ورد
بابا: اه انتو فين .. انت مش طالع .. تمام خلاص خليه يطلع
ميدو روح افتح باب الشقة.. ماشي يا ادهم انا في انتظاره
بابا: يلا يا بنات وانت يا سعيد وانتي يا نظلة .. كل واحد يروح على الأوضة بتاعته .. محدش يخرج منها غير لما انده عليه
بصينا كلنا لبعض بأستغراب الا أحلام
كانت بتضحك وبتهز راسها كانها عارفة
اللي بيحصل ومش فارق معاها
بابا قام وقف واستنى الشيخ مغربي لما طلع
الشيخ وقف قدام الباب وبابا لسة هيطلع علشان يسلم عليه شاور له بأيده يفضل جوه وبقى عمال يقول كلام غريب .. كلام مش مفهوم وفي ايده حديده منقوش عليها كلام بلغة غير مفهومة شبه اللغة الفرعونية
وزجاجة رش بيها على باب الشقة وعلى الأرض بجوار العتبه
وقبل ما يدخل الشقة قوة رهيبه جت من جوه الشقة وراحت حادفة الشيخ مغربي اترطم بالحيطة اللي قدامنا وبابا اتشال بنفس القوة واتحدف ل اخر الصاله والباب اتقفل
وفضلت أحلام قدام باب الشقة بشعرها المنكوش المغطي وشها والبياض مغطي عنيها .. وفجأة وقعت على الأرض وبقى بيخرج من بوقها دخان اسود بيتشكل في الجو على هيئة راجل .. الدخان خرج من تحت باب الشقة .. وبعد لحظات رجع تاني
ودخل في جسم أحلام مرة تانيه
فاقت وقفت على رجليها ودخلت اوضتها تاني
في الوقت اللي بابا اتحدف بقوه ل اخر الطرقة بتاعة الصاله كنا خرجنا كلنا على صوت هبد بابا انا وماما وسعيد
جرينا على بابا وشوفنا أحلام وهي نايمة عالارض والدخان بيخرج منها ويخرج وبعدين رجع تاني
كنا خايفين منها وماما حاضنة بابا بتفوقه وعينا كلنا على أحلام
بعد ما أحلام قامت ودخلت اوضتها جريت انا واخويا لبره الشقة نشوف الشيخ جراله ايه لكن الغريب انه مكنش موجود بره
وعرفنا تاني يوم ان الشيخ مغربي انتحر ورمي نفسه في النيل
اسود اسبوع ممكن تتخيلوا مر علينا الاسبوع اللي بعد موضوع الشيخ ده
شوفنا فيه كل حاجة ممكن تشيب الراس.. حرايق في الشقة .. نار بتمسك في الستاير وفي الابواب ونلحق نطفيها
الشقة اتبهدلت الدهان بتاعها وقع .. والعفش بتاعنا اغلبه اتحرق .. جربنا نجيب شيخ تاني رفض
الشخص الوحيد اللي لما كان يجي عندنا الدنيا تبقى هاديه كان هو احمد خطيبي اللي اكتشفت بعد اسبوعين ويومين من خطوبتنا اني كنت مخطوبه ل……….
بدايه معرفتي بحقيقة احمد كانت بالصدفة البحته
بالليل وانا بذاكر قولت اريح شوية من المذاكرة وافتح الفيس
فتحت الفيس لقيت تعلىق قدامي من نورهان صاحبتي على بوست منزله محمود خطيبها .. محتوي التعليق ده الله يرحمة يارب
المفاجأة اللي عمري عمري عمري كله ما كنت اتخيلها ان الميت ده من سنه والبوست اللي كان منزله محمود بينعي فيه صاحبه محمد اسماعيل اللي ميت من سنه وكاتب على صورته وحشتني يا صاحبي الله يرحمك
الصورة بتاعة محمد دي هي صورة احمد خطيبي
اتجننت وانا شايفة الصورة.. ازاي؟
ده احمد خطيبي مش اللي اسمه محمد وميت من سنه
فتحت حساب محمود ودخلت على الصور بتاعته اشوف الصور القديمة يمكن القي صور تانيه بينهم او ليه
توضح انه مجرد شبه ومش هو
فضلت انزل لتحت لغاية سنة فاتت
وكانت الصدمة ايوة الصدمة انه هو
مفيش حاجة اسمها شبهة.. ده هو احمد
طب ازاي .. يعني انا اتخطبت لميت؟
طب ايه احمد دي
اتصلت بسرعة ل نورهان افهم منها مين محمد ده وازاي هو احمد خطيبي.
نورهان مكنتش فاهمة انا بقول ايه
وبقيت بحاول افهمها بعدين قفلت معاها وفتحت الفيس بتاعها علشان ابص على صور خطوبتها .. الصور اللي كان فيها احمد
وكانت المفاجئة التانيه والصدمة الاكبر
وانا بتفرج على الصور كانت رؤيتي للصور زي ما يكون فيها ضباب . والصور بتظهر ليا . ولقيت ان الشكل اتغير.. اللي واقف معاهم في الصور مش احمد خطيبي .. ده واحد معرفوش.. هتجنن .. ايه ده؟ مين ده انا معرفوش
فتحت البوم الصور اللي كنت متصوراها معاه لما كنت خارجين في الجزيرة
لقيت كلام نورهان كان صح .. مفيش صورة وش احمد فيها ظاهر.. كل الصور الشمس ضاربه في وشه.
اتأكدت ان اللي خطبني ده ونام معايا مش بني ادم ده جني .. واخد شكل واحد ميت .. وواخد اسم واحد موجود لكني معرفوش
خرجت جري من الأوضة وانا بعيط مش قادرة امسك نفسي من العياط
جريت على اوضة ماما اترميت في حضنها وانا بحكي ليها على احمد وعلى اللي اكتشفته
ماما حضتنتني وبقت هي كمان بتعيط معايا وبابا بيضرب كف على كف مش عارف يعمل ايه
خرجت من عند ماما وانا مكسورة متحطمة مش عارفة انا ليه بيحصل معايا كدة . وافتكرت كمان انه هتك عذريتي.
دخلت الاوضة اترميت على سريري وانا مش فاصلة من العياط
وحسيت بأيد بتمشي على ضهري
قومت بدماغي اشوف مين
لقيت احمد قاعد جنبي عالسرير
قومت بسرعة قعدت على قرافيصي وبستخبي في الحيطة.. خايفة منه
وهو بيبصلي ووشه مضايق جدا، ولون وشه بيتغير، بيزرق كانه بيعفن من المرض متكلمش ولا كلمة . كان بيبصلي بس وانا بحاول استخبي وابعد عنه وبرجع بجسمي عاليحطة اللي لازقة في السرير، وفجأة اختفى.
فات يومين ولقينا الشيخ فتحي جوز خالتي جه زيارة لينا البيت ومعاه شخص محدش فينا يعرفة
اختي استخبت في اوضتها وكانت خايفة جدا منه وقافلة عليها من جوه
جوز خالتي الشيخ فتحي والراجل اللي معاه وبابا قاعدين في الصاله بيتكلموا
……
الشيخ فتحي: ازيك يا سامي عامل ايه دلوقت
سامي: الحمد لله والله . انت عامل ايه ومراتك وعيالك
الشيخ فتحي: الحمد لله .. اعرفك بزميلي وصاحبي الشيخ وجدي
سامي: اهلا وسهلا بيه وبيك معلش يا جماعة على منظر الشقة .. انت عارف يا شيخ وجدي اكيد مراتك حكت ليك
الشيخ وجدي: وبيك يا عم سامي
الشيخ فتحي: اه عارف واحنا علشان كدة جينا النهاردة ..قولي بقى ماشي على العلاج
سامي: اه والله ماشي على اربع انواع علاج وبخاختين لما خلاص زهقت
الشيخ وجدي معلش ياعم سامي الله يعفي عنك ويشفيك.
الشيخ فتحي: بص يا سامي . صاحبي الشيخ وجدي استاذ في التنويم المغنطيسي وبيخرج معانا في حالات العلاج من الجان ويعتبر هو زي ما بيقولو راس الحربة بتاعتنا هههههه
سامي: اهلا وسهلا بيك يا شيخ وجدي
الشيخ وجدي: الله يعزك يارب
الشيخ فتحي: انا حكيت له على اللي هنا والشيخ وجدي جاي النهارده بس علشان يقعد معاك ويتعرف بيك وان شاء الله بكره هنجيلك تاني بس بعد اذنك عايزين ناخد لفة في الشقة
سامي: ده بيتك يا فتحي انت بتقول ايه
الشيخ فتحي قام هو الشيخ وجدي اتمشوا في الشقة وبيقولوا كلام في سرهم مع بعض وبيبصوا على كل ركن في الشقة اللي باين عليها ان النار مسكت في كل حته فيها،
واول ما جم ناحيه اوضة أحلام اشتغل فيها الهبد والرزع والصريخ، والشيخ فتحي والشيخ وجدي مش ساكتين بيقروا بره الأوضة
لغاية ما أحلام صرخت صرخة كبيره والصوت فجأة راح
الشيخ فتحي .. انا كدة فهمت فيه ايه
ماما خرجت من الاوضة وانا واخويا خرجنا
ماما سالت الشيخ وفتحي.. هو ده ايه اللي على بنتي وعلينا ده ايه؟
الشيخ فتحي: للاسف ده جني متسلط
انا: متسلط ازاي؟ تقصد عاشق
الشيخ فتحي لا مش جن عاشق ده جن متسلط
ماما: متسلط .. مين اللي مسلطة علينا ده
الشيخ وجدي: انا اسف يا شيخ فتحي تسمحلي اتكلم
الشيخ فتحي: اه طبعا اتفضل ..
الشيخ وجدي: ده اللي هنعرفة منكم انتو
بابا: منهم ازاي؟
الشيخ فتحي: مانا جبت الشيخ وجدي معايا علشان كدة .. بالتنويم هنعرف منهم اللي هيخافوا يقولوه وهما صاحيين
ماما حاولت تفتح الباب على أحلام
الشيخ وجدي: محدش يفتح الباب، طول ما احنا هنا الباب مش هيتفتح
الشيخ فتحي: الليلة أحلام هتتعب وهترجع ويمكن تسخن هتسمعو صراخ وعياط وبكاء في كل حته في الشقة
اياكم حد يروح ليها ولا يدخل ليها، متصعبش عليكم ولو حد بينام معاها الليلة دي بالذات محدش ينام معاها
هتنامو كلكم في اوضة واحدة الا هي، وتحصنو نفسكم ب……..
وبكره هنبقى عندكم من الصبح بدري
الشيخ فتحي مشي هو والشيخ وجدي واحنا عملنا كل اللي قال عليه
دخلنا اوضه بابا وحبسنا نفسنا فيها
وطول الليل صوت هبد ورزع وصراخ وعويل .. اصوت ناس لتزعق . وعيال بتبكي واختي بتصرخ الحقيني يا ماما
ماما كانت عايزة تخرج ليها وتاخدها في حضنها لولا بابا وانا واخويا منعناها
طول الليل ماما بتعيط على أحلام صعبانه عليها .. لغاية ما الفجر اذن ونور الصبح طلع، وصوت اختي والبكاء بتاعها اختفى
البيت اصبح هادي لغاية ما لقينا على الساعة عشرة الصبح
كل الابواب بتاعة الشقة بتتفتح وتتقفل بقوة .. وكل أكواب الازاز بتقع وتتكسر
اي حاجة فيها ازاز كانت بتتدشدش وتتكسر وفجاء لقينا باب اختي اتقفل ومرضيش يفتح وجرس الباب ضرب
خرجنا من الأوضة بتاعة ماما وبابا كلنا خايفين بنلتفت ورانا وقدامنا
واخويا فتح باب الشقة ودخل الشيخ فتحي والشيخ وجدي
الشيخ فتحي جمعنا كلنا في الصاله الا اختي أحلام اللي كانت في اوضتها مستخبيه
الشيخ وجدي طلب من بابا يدخل لوحده الاوضة بتاعته
الشيخ وجدي دخل الأوضة وبعد شوية نده من جوه وطلب ماما تدخل له
ماما دخلت وقعدت مع الشيخ وجدي اكتر من نص ساعة وبعدين خرجت
بعدها جه الدور على سعيد اخويا وبعد ساعة خرج .. وجه الدور علي دخلت
الشيخ طلب مني اقعد قدامه .. وحط ايده على راسي وبص في عنيا وبدأ يقرا. حسيت نفسي مش موجوده معاه وشايفة شريط اللي اللي حصل معايا
وكل ما بسألني على حاجة .. الاقي نفسي بحكيله
حكيت له كل اللي شفته واللي حصل معايا . نومي مع اخويا .. ونوم اختي مع اخويا .. ونوم ماما مع اخويا.. وعلاقاتي بأحمد والمكان اللي وداني له
وانه فتحني .. بعدها الشيخ سألني عن الأحلام اللي بحلمها .. والكوابيس سواء ان كنت نايمة او صاحيه
حكيت له كل حاجة حلم بتاع المقابر وكوابيس تانيه كتير
وفجأة راح صحاني من النوم
ونده على الشيخ فتحي قعد معاه جوه بتاع نص ساعة وبعدين الأتنين خرجوا، وطلبو من ماما وبابا طلب غريب
انهم عايزين يزور عمتي في المستشفى
بابا: اختي !؟ ليه يا فتحي
الشيخ فتحي: هتعرف وتسمع بودانك لما نروح
الشيخ وجدي مشي ناحيه اوضة اختي وقف ورا الباب المقفول قعد يجي ساعة ورا الباب عمال يقرا
وبعدين جالنا وقال انه كتف الجن اللي عليها ومحدش يقلق خالص النهاردة منها
عادي لو فتحت الباب وخرجت . اتعاملوا معاها طبيعي جدا
وبكره يا عم سامي هنطلع للمستشفى مع بعض وان شاء الله هنفهم كل حاجة
….
وفعلا الليلة كانت هادية ومفيش اي حاجة غريبة حصلت
وتاني يوم الشيخ وجدي وبابا والشيخ فتحي راحوا المستشفى لعمتي، الممرضة مكنتش عايزه تدخلهم كلهم غرفة الرعاية لولا ما الشيخ فتحي ادها 100جنيه.
قعدو قادامها في غرفة الرعاية وبدأ الشيخ وجدي يشوف شغله …. ونيم ايمان تنيم مغنطيسي وبدأ يسألها وهي تجاوب
وكانت الصدمة الكبيرة لبابا
عمتي بسبب رفض ماما ورفضي لابنها طه راحت لواحده مشهورة عندهم في البلد بتعمل اعمال سفليه وبتحضر ارواح وبتسخر الجان
سخرت جن سفلي، وكان الجسم الحاضن للجن ده هي أحلام والسبب في اختيار أحلام انها كانت الوحيدة اللي ديما بتنزل صورها عالفيس واخدت صورتها وودتها للشيخ ده
اما سبب الحادثة ان اللي عملت العمل وسخرت الجان معرفتش تسيطر عليه واتقلب ضدهم وبقى متحكم في نفسه وفيهم والمفاجئة الكبيرة ان طه مامتش وان جسمه اختفى يوم الحادثة، واللي ادفن ده واحد تاني غير طه كان ميت في الحادثة من ضمن ناس تاني ماتت والجن شكل وش الميت على وش طه
ايمان قالت ليهم على مكان السحر.. مدفون في تربه في البلد .. قالت عليها
بابا كان هيتجنن من الكلام اللي بيسمعة بودانه ومشي من المستشفى وهو مش مصدق ان اللي فيه اهل بيته ده كانت اخته هي السبب فيه
ابويا روح البيت والشيخ وجدي والشيخ فتحي مشيوا من برا على مكان الترب دي وطلعوا السحر و المدفون .. وجم لينا تاني يوم قروا تلات ساعات في البيت
واللعنه من يومها مبقتش موجوده في بيتنا
بعد تلات ايام من انتهاء اللعنة طه رجع وكان مفتكر كل حاجة
وعمتي خرجت من المستشفى لكنها خرجت مريضة نفسيا واخواتها اتكفلوا برعايتها لكن بابا مقدرش يسامحها وقاطعها نهائي
اه نسيت اقولكم ان الشيخ وجدي بعد ما خلصنا من اللعنة اخدني الأوضة وقالي متخفيش انتي زي مانتي لسة عذراء .. ممارسة الجن مبتأثرش على غشاء البكارة والدليل انتي يومها منزلش اصلا منك دم
وبكدة نكون خلصنا قصة الصدمة
اتمني تكون عجبتكم
ممتاز
من أروع القصص
جميله جداومثيره
من أجمل القصص التى قرأتها
جميلة جدا وأتمنى من كاتبها الإستمرار
شيقة جدا