البيت الكبير | الجزء الثالث – الحلقة السادسة
مايو
الهام : صباح الخير يا عمدة
العمدة : صباح النور يا الهام امال جوزك فين
الهام : جوزي نزل من بدري راح شغله
الحاجة صباح : امال لابسه رايحة فين كده من بدري
الهام : رايحة بيت ابويا .. ابقي وصلني في سكتك والنبي يا عمي
العمدة : ماشي يا الهام .. امال سعاد محضرتش الفطار ولا ايه
صباح : بتحضره .. الا انا قومت بالليل بصيت عليك جنبي ملقتكش ؟ كنت فين يا مصلحي
العمدة : كنت مطرح ماكنت من امتى وانتي بتسألي اصلا
صباح : عندك حق .. انا قايمه ابص على الفراخ
الهام : مش هتفطري معانا يا مرات عمي
صباح : انا سبقتكم . بالهنا انتوا
صباح مشيت. والهام ميلت على العمدة
هنطلع من هنا عالشهر العقاري. تخلص التسجيل وبعدين. تاخدني على بيت ابويا
العمدة : اكيد طبعا
سعاد عملت الفطار والعمدة والهام فطروا، بعد الفطار العمدة اخد الهام وراح بيها الشهر العقاري. وسجل الأرض والبيت باسمها والهام اخدت العقود المتسجلة وراحت بيت ابوها
البيت الكبير
الهام : ازيك يا رشا
رشا : ازيك يا بت يا الهام .. عاملة ايه انتي وجوزك
الهام : بخير .. ايه جوزك عامل ايه في الشغل الجديد
رشا : اهو ماشي الحال وهيجي خلاص كمان يومين وظبط مواعيده وهيبقى شغال هنا وفي مصر
زينب : ازيك يا بت يا الهام. ايه جيتي امتى؟
الهام : بخير يا حبيبتي . انا لسه جايّة حالا مفيش خمس دقايق
الهام : طيب اسيبكم واطلع اسلم على امي
زينب : استني يا بت خليكي قاعدة معانا شوية والحاجة كده كده شوية وهتنزل
………………
نعمة : بقولك ايه يا وجدي انا زهقت من القعدة هنا ما تيجي نروح بيت ابويا
وجدي : انا هروح اعمل ايه هناك
أحمد ومسافر القاهرة وعصام وحسين في شغلهم
نعمة : خلاص وصلني انت بيت ابويا وانت روح اقعد مع عصام او حسين في المحل
انت ما زهقتش من قعادك في البيت
وجدي : انا كنت بفكر اخدك وننزل مصر نقعدلنا هناك اسبوع
نعمة : لا انا مش هرتاح في مصر .. متنشاش انا من ساعة ماتجوزنا عمري ما روحت ولا فيه بيني وبين امك ولا ابوك اي تعامل يدوب نسلم على بعض بالتليفون وهما بيزرونا كل فين وفين ..
وجدي : وايه المشكله لما نسافر يا حبيبتي وهي فرصة تقربي منهم وتعرفيهم ويعرفوكي
نعمة : نبقي نروح لما يجيلك جواب التعيين انا في دلوقت هتوصلني بيت ابويا ولا ايه
وجدي : ماشي يا ستي حاضر هو انا اقدر اقولك لا . هوصلك بعدين هرجع انا البيت
نعمة : ماشي براحتك
…………….
بالليل بعد ما عصام روح البيت واتعشى ودخل علشان ينام
عصام : حضريلي كام هدمه كده في الشنطة الصغيرة علشان بكرة نازل القاهرة وممكن القعدة تاخد يومين تلاتة
زينب : يا ما كان نفسي اسافر معاك مصر يا عصام واتفرج على الفيلا الجديدة
عصام : ادعي بس اني اشتريها
زينب : ليه انت ممكن متشتريهاش
عصام : لا هشتريها طبعا بس متقاطعيش
زينب : خلاص هقوم انا احضرلك هدومك والكام غيار اللي هتاخدهم.. الا صحيح انت هتنزل في البيت بتاع مصر
عصام : لا البيت بتاع مصر مش مفروش
زينب : طيب ما كده كده شقة رشا انا سمعت ان أحمد فرشها وهو قاعد لوحده ماتقعد معاه اليومين اللي هتنزلهم
عصام : لا انا هشوفلي شقة مفروشة اليومين دول
زينب : بقولك ايه يا عصام كنت عايزة اطلب من طلب كده
عصام : طلب ايه ؟
زينب : كنت عايزة تلفون زي بتاع اختك الهام معرفش بيقولوا عليه تشطت ولا ايه
من اللي بيدخل على النت
عصام : نعم يا ختي تلفون ايه .؟ تشطت ؟
وعايزة تدخلي على النت كمان ؟ داحنا اتمدنا اوي اوي يا زينب
زينب : ديهدي ومالوا يا راجل لما ابقى زي اختك الهام. واختك نعمة ورشا هو انا مش زيهم
عصام : حاضر يا زينب هجبلك التلفون حاضر وهجبلي واحد وهجيب ل أسماء وحسين كمان
زينب : هتصرف كل الفلوس دي. ده غالي اوي
عصام : ومالوا يا بت هي الفلوس اتعملت ليه مش علشان تتصرف ..
زينب : انا كده حطتلك هدومك وغياراتك
عصام ؛: طيب اطفي النور بقى علشان عايز انام
……..
تاني يوم الصبح عصام سافر القاهرة وقابل السمسار بتاع الفيلا وطلب منه الأول يشوفله شقة مفروشة.
وفعلا السمسار جابله شقة وعصام راح الشقة حط هدومه فيها وريح شوية. على ما السمسار كلمه علشان يروحوا يقابلوا صاحب الفيلا
عصام قابل السمسار وراح قابل صاحب الفيلا وقعدو معاه اكتر من ساعتين على ما اتفقوا على السعر
عصام : قالهم بكرة نتقابل ومعايا محامي معاه عقود البيع
الراجل صاحب البيت قاله معنديش مشكلة
وفعلا عصام والراجل صاحب الفيلا. خلاص اتفقوا على كل شيء ومش فاضل غير الامضا على العقود والراجل ياخد جزء من الفلوس
وبعد التسجيل ياخد الباقي له
وتاني يوم البيع تم بوجود المحامي والراجل قبض الفلوس بتاعته وطلعوا في نفس اليوم على الشهر العقاري وكل حاجة خلصت زي ما عصام كان عايز
واتفق مع السمسار يدور له على فيلا تاني تكون قريبة من فيلته
والسمسار وعده ان هيشوفله فيلا قريبة منه
……………..
العمدة راح البيت الكبير وهو شايل خبر مش حلو
راح وخبط على البيت. وزينب فتحتله
العمدة : مساء الخير يا زينب .. ازيك يا أسماء
أسماء : بخير يا عمدة وازي الحاجة صباح
العمدة : بخير وبتسلم عليكم
زينب : مساء النور يا عمدة .. اتفضل
العمدة : يزيد فضلك يا بنتي انا عديت على المحل بتاع عصام ملقتهوش والولا عوضين قالي ان عصام سافر مصر
زينب : ايوه يا عمدة خير في حاجة ولا ايه
العمدة : مش عارف اقولك ايه. بس عصام مطلوب في القسم للتحقيق معاه في قضية قتل الحاج كرم
زينب : يا مصيبتي ؟ يحققوا مع عصام جوزي؟
أسماء ،: يحققوا مع عصام ليه يا عمدة ؟
العمدة : : جاتلي اشارة من القسم ولازم عصام بكرة الصبح يكون قدام البيه رئيس المباحث وانا عمال اتصل بيه تليفونه غير متاح
زينب : وهما عايزين يحققوا مع جوزي ليه
مال عصام ومال كرم
الحاج نعمان : اللي عرفته عن طريق ناس حبايبي في القسم ان فيه ناس من البلد قالت في التحقيق على تهديد عصام للحاج كرم زمان بالقتل
زينب : يا مصيبتي .. عصام ؟ امتى الكلام ده
العمدة : الكلام ده عدى عليه وقت كبير يمكن اكتر من سنة. بس الحكومة بدور على اي حاجة علشان توصل للقاتل
المهم حاولي توصلي لعصام بأي طريقه علشان الصبح لازم يكون قدام البيه رئيس المباحث.. يلا فتكم بالعافية
العمدة مشي وقعدت زينب حاطه ايدها على راسها ومش عارفه تعمل ايه
في نزول رشا من فوق هي والحاجة أمينة شافوا زينب وهي بتبكي وحاطه ايدها على راسها
رشا : في ايه يا زينب مالك؟
أمينة : ايه مالك يا زينب ؟
زينب : مصيبة مصيبة وحطتت على راسي
رشا : مصيبة ايه .. اتكلمي وقعتي قلبي
زينب : العمدة كان لسه هنا وقالي ان عصام مطلوب في القسم للتحقيق معاه علشان قتل كرم
رشا : ويحققوا مع عصام ليه ؟ هو كان فيه بينهم اصلا تعامل
أمينة : ايوه صحيح اشمعنى عصام اللي عايزين يحققوا معاه ؟
زينب : علشان عصام زمان اتخانق مع كرم وهدده قدام الناس كلها بالقتل بس الكلام ده من اكتر من سنة
رشا : يا ليلة سودة ده كده ممكن يكون عصام متهم بقتل كرم.. طب اتصلتي بعصام
زينب : لسه . هتصل اقوله ايه ؟
رشا : قوليلو الحقيقة هي ده موضوع ينفع يستخبى قومي اتصلي بيه
زينب : طيب والنبي يا رشا تليفونك وكلميه انتي انا مش هقدر اقوله حاجة زي كده
رشا : حاضر. هطلع اجيب تليفوني من فوق نسيته
الحاجة أمينة : خير يا زينب متخفيش عصام البلد كلها تعرفه وتعرف ان عمره ما يعمل كده ابدا
رشا نزلت وقالت عمالة اتصل بعصام تليفونه مقفول
زينب : طيب اتصلي ب حسين وعرفيه
رشا: اتصلت بيه فعلا واتصلت بأحمد وعرفته وهو جاي بكره
…….
عصام بعد ما خلص شراء الفيلا واستلم مفاتيحها راح غير كل كوالين الفيلا وبعدين
وبعدين راح اشتري التليفونات اللي وعد مراته بيها وبعدين راح الشقة
طلع التليفون ولقاه فاصل شحن
حطه على الشاحن ونسي يفتحه وراح قالع هدومه ومدد جسمه على السرير على وراح في النوم
صحي على الساعة 10 بالليل. شال تليفونه من الشاحن ولبس هدومه وحط هدومه في الشنطة والموبايلات الجديده وراح نازل ركب عربيته ومشي على البلد
وهو في الطريق افتكر التليفون… راح فاتحة
لقي مكالمات كتير اوي
شوية لما رشا جالها رساله ان تليفون عصام اتفتح اتصلت بيه
عصام : ايوه يا رشا
رشا : انت فين من الصبح تليفونك ليه مقفول قلقتنا عليك
عصام : مكنتش واخد بالي خالص ان التليفون مقفول .. عموما انا في طريقي للبلد
رشا : طيب كويس تيجي بالف سلامة
عصام : فيه حاجة ولا ايه
رشا : لما تبقي تيجي كلام الفون مش هينفع
…..
الدنيا اتقلبت في بيت نعمان لما كله عرف وكل اخواته البنات كانوا في البيت الهام ونعمة واجوازهم وكلهم قاعدين مستنين عصام يجي من مصر
وحسين. كلم محامي علشان يحضر مع عصام التحقيق بكره
وكلهم متجمعين وقاعدين كلهم مستنين عصام يجي من مصر
عصام وصل البيت على الساعة واحدة بالليل ركن عربيته في الجراج واخد منها الشنطة بتاعته وشنطة الموبايلات ودخل البيت
اتفاجئ بوجود الكل قاعد ومستنيه وفهم ان فيه حاجة
زينب قامت اخدت الشنط من عصام
حمدلله بالسلامة يا عصام
عصام قعد وبص عليهم وهو مستغرب مش عارف في ايه
عصام : قلبي بيقولي في حاجة
حسين : لا مفيش يا عصام روحي يا زينب اعملي لقمه لجوزك يتعشى
عصام : لا انا اكلت في الطريق ..
حسين : بصراحة يا خويا العمدة جه النهارده وقابل مراتك وقالها انك بكرة الصبح تكون في القسم عند رئيس المباحث علشان عايزين ياخدوا كلمتين منك
عصام : انا ؟ ليه ؟
زينب : علشان قضية قتل المدعوك كرم
وجدي : متخفش يا عصام هما اكيد هياخدو منك كلمتين وهيمشوك
أسماء : ربنا يسترها وتعدي على خير
جلال : كلنا هنروح معاك الصبح
حسين : وانا كلمت محامي علشان يروح معاك
عصام : محامي كمان ؟ انا مش فاهم ايتها حاجة ليه انا اللي عايزين يحققوا معايا
حسين : علشان انت هددته قدام الناس بالقتل
عصام : هددته بالقتل ؟ ده الموضوع ده من زمان اوي ده ده يجيله اكتر من سنة
أمينة : متخفش يا عصام انت معملتش حاجة
عصام : مخفش ازاي بس وانا شايف من كلامكم اني متهم بقتل كرم
حسين : للاسف يا عصام المحامي قالي انهم ممكن بكرة تتوجهلك تهمة القتل
عصام : يا ليلة كوبيه … يعني كرم ده يعكنن عليا حياتي وهو حي وهو ميت
وجدي : طيب يا جماعة انا همشي والصبح بدري هكون قدام القسم
جلال : خدني معاك يا وجدي
الحاجة أمينة : خدي جوزك يا زينب وادخلوا ناموا شوية على الصبح خلاص وانتوا يلا اطلعوا علشان
عصام : نوم ايه بس هو انا هيجيلي نوم
أسماء : وحياتك يا عصام لهيطلع الموضوع بسيط بس انت قول يا رب
عصام : يا رب يا أسماء .. اه صحيح يا حسين
انا جبتلك وجبت ل أسماء مراتك تليفونات جديده وانتي يا زينب هاتي الشنطة دي علشان جبتلك تلفون جديد
حسين : تليفونات ايه بس يا عصام ده وقته
عصام : ربك يسترها
أسماء : ربنا يخليك يا عصام بس تلفونات ايه
زينب جابت الشنطة لعصام، وعصام ادا لكل واحد التليفون بتاعه
ومحدش رضي يفتح علبة التليفون ويشوفوا
بسبب زعلهم على عصام
عصام قام علشان ينام شوية وزينب مجلهاش نوم خالص وفضلت قاعدة للصبح وهي حاطه ايدها على راسها
الصبح بدري عصام قام استحم ولبس هدومه وحسين كان مستنيه ومشيوا مع بعض وهناك اتقابلوا مع المحامي اللي قعد مع عصام شوية وفضل يتكلم معاه علشان يعرف هو قال ايه بالظبط قدام اهل البلد لكرم ..
وجدي وجلال راحوا القسم وفضلوا واقفين مع عصام وحسين لغاية ما رئيس المباحث نده على عصام
دخل عصام والمحامي
ورئيس المباحث فضل يوجه الأسئلة لعصام
وكان رد المحامي إن عصام قال كده لما كرم اهان ابوه قدام الكل وكان كلام لحظة ضيق مش اكتر والدليل ان عصام منفذش تهديد
وان الموضوع عدي عليه اكتر من سنه ومش من المعقول ان عصام يستني سنه كامله علشان ينفذ تهديده
لكن رئيس المباحث قرر تحويل عصام لوكيل النيابة ونده على العسكري يحط الكلبشات في إيد عصام. وينزله الحجز
عصام خرج هو والمحامي والكلبشات في ايده
حسين اول ماشاف عصام متكلبش قام مفزوع… في ايه يا جماعة طمنوني
المحامي : رئيس المباحث حول اخوك للنيابة وهيروح للنيابة المسائية
عصام : المحلات والارض والبيت دلوقت مسؤوليتك يا حسين وخد بالك من مراتي وعيالي
حسين : في عيني. وبإذن ربنا انت مش هتطول هنا وهترجع تاني كبير العيلة وتاخد بالك من كله بنفسك
وجدي : احنا مش هنسيبك يا عصام
جلال : كلنا معاك وفي ضهرك
أحمد جه جري بعد ما رجع من مصر
خير يا جماعة
عصام بصله وهو قرفان منه . وقال للعسكري يلا بينا يا دفعة
عصام مشي وأحمد سأل حسين في ايه يا حسين. هو عصام اتوجه له تهمة القتل؟
حسين : ايوه يا أحمد واتحول للنيابة وبالليل رايح للنيابة
رشا عمالة تتصل كل شوية بحسين علشان تطمن على عصام وطمن زينب
حسين رد عليها وعرفها اللي حصل
وزينب لما عرفت اللي تم اغمي عليها وبقت الستات بتحاول تفوقها
البيت الكبير اتقلب على حبس عصام
والحاجة صباح مرات العمدة من الصبح راحت لزينب وسامية لما عرفت راحت للحاجة فاطمة وقالتلها. والحاجة فاطمة هي كمان راحت لزينب
زينب بعد ما فاقت قعدت تعيط على جوزها اللي اتهموه ظلم بقتل كرم والكل حواليها
بيحاول يهديها ويقولها اكيد الحقيقة هتبان
وفاطمة قاعدة وعارفه ان اللي قتل جوزها مش عصام ومش قادرة تتكلم علشان ساعتها سمعتها هتبقى في الوحل بسبب علاقة الحاج نعمان بيها
وزينب لما فاقت وشافت الحاجة فاطمة قامت وكانت هتمسك فيها وفضلت تقولها
انتي جايّة ليه. كل اللي احنا فيه بسببكم
والستات بيحوشوها بالعافية
رشا : معلش يا حاجة فاطمة والنبي متزعلى منها ده غصب عنها
فاطمة : انا عارفه وانا فعلا غلطانه اني جيت مكنش المفروض اجي
رشا : لا متقوليش يا حاجة فاطمة ده جيتك دي فوق راسنا وبعدين انتي ذنبك ايه
الحاجة فاطمة : طيب انا عايزة اطلب منك طلب علشان زي مانتي شايفه يمكن مقدرش اجي تاني هنا وجمايل الحاج نعمان ربنا يرحمه ومن بعده ابنه عصام مغرقاني وانا عايزة اطمن عليه يعني لو ينفع تديني رقمك
رشا : بس كده حاضر هقوم اكتبلك رقمي في ورقة
رشا قامت وكتبت رقمها وادته للحاجة فاطمة وبعدها الحاجة فاطمة مشيت